Warbaahinta Sacuudiga ayaa baahisay in tiro ka mid ah dowlado Carbeed iyo Islaami ah ay bilaabeen tallaabooyin adag oo ay kaga falcelinayaan waxa ay ku tilmaameen siyaasado qalafsan oo ka socda Imaaraadka Carabta.
Dowladaha la sheegay in ay si wadajir ah ama gooni-gooni ah u muujinayaan mowqif adag ayaa kala ah:
Sacuudi Carabiya
Suudaan
Yemen
Pakistan
Jabuuti
Soomaaliya
Aljeeriya
Ilo ku dhow arrintan ayaa sheegay in dowladahan ay ka wada tashanayaan hab ay ku wajahayaan arrimo ay ka mid yihiin faragelin siyaasadeed, taageero kooxo hubeysan, iyo khilaafaad ku saabsan danaha gobolka.
Qaar ka mid ah waddamadan ayaa durba bilaabay tallaabooyin diblomaasiyadeed oo ay ku muujinayaan walaacooda, halka kuwo kalena ay qorsheynayaan kulammo heer sare ah si ay mowqif mideysan uga gaaraan arrinta.
Inkasta oo aan si rasmi ah loo shaacin tallaabooyin ciqaabeed ama go’aano kama dambeys ah, haddana falanqeeyayaal siyaasadeed ayaa sheegaya in dhaq-dhaqaaqan cusub uu muujinayo isbeddel ku yimid xiriirkii qaar ka mid ah dowladaha Carabta iyo Imaaraadka.
Waxaa la filayaa in maalmaha soo socda ay soo baxaan warar dheeraad ah oo la xiriira go’aannada ay qaadan doonaan dowladahan, maadaama xiisaddan ay saamayn ku yeelan karto xasilloonida iyo wada shaqeynta gobolka.
