Dowladda Federaalka Soomaaliya ayaa guul taariikhi ah ka gaartay fagaaraha diblomaasiyadda Afrika kadib markii si rasmi ah loogu doortay inay xubin ka noqoto Golaha Nabadda iyo Ammaanka ee Midowga Afrika (Peace and Security Council – PSC) muddada u dhexeysa 2026 ilaa 2028.
Doorashadan ayaa ka dhacday shir ay yeesheen dalalka xubnaha ka ah Midowga Afrika, waxaana Soomaaliya ku heshay codad aqlabiyad ah, taasoo muujinaysa kalsoonida sii kordheysa ee ay dalalka Afrika ku qabaan hoggaanka iyo dadaallada Soomaaliya ee dhanka nabadda, xasilloonida iyo amniga guud ee qaaradda.
Golaha Nabadda iyo Ammaanka ee Midowga Afrika (PSC) waa hay’adda ugu sarreysa ee qaabilsan go’aan ka gaarista arrimaha nabadda, amniga, xalinta colaadaha, iyo ka hortagga khataraha amni ee qaaradda Afrika. Xubinimada Soomaaliya ee golahan ayaa u oggolaan doonta in ay door muuqda ka qaadato dejinta istaraatiijiyadda amni ee Afrika, isla markaana ay codkeeda gaarsiiso heer gobol iyo caalami.
Mas’uuliyiin ka tirsan Dowladda Federaalka Soomaaliya ayaa sheegay in guushan ay tahay mid ka dhalatay dadaallo diblomaasiyadeed oo ballaaran, kuwaas oo ay hormuud ka ahaayeen Wasaaradda Arrimaha Dibadda iyo xafiisyada diblomaasiyadeed ee dalka dibaddiisa ku sugan.
Sidoo kale, Dowladda Soomaaliya ayaa ku tilmaantay doorashadan inay tahay tallaabo muujinaysa in Soomaaliya ay dib ugu soo laabatay doorkeedii hoggaamineed ee qaaradda Afrika, islamarkaana ay ka go’an tahay in ay door wax ku ool ah ka qaadato sugidda nabadda iyo xasilloonida dalalka Afrika.
Ugu dambeyn, xubinimada PSC ayaa fursad weyn u noqon doonta Soomaaliya si ay u xoojiso iskaashiga dalalka Afrika, una horumariso istaraatiijiyado wadajir ah oo lagula tacaalayo caqabadaha amni ee ka jira qaaradda.
